Agartha, si Admiral Richard Byrd at ang Secret Diary (Hollow Earth Part 2)

May mga ilang indibidwal daw na nakarating na sa Kaharian ng Agartha, na sinasabing matatagpuan sa kaila-ilaliman ng ating mundo!

Isa na dito ang tinitingala pagdating  sa larangan ng explorasyon — si Rear Admiral Richard E Byrd. Paano nga ba siya napadpad daw sa Agartha? 

Narito na tayo sa PART 2 ng ating Hollow EarthSeries. Originally ay 3 parts lang dapat itong series na ito ngunit mukhang aabot tayo sa Part 5 dahil napakalawak ng diskusyon tungkol dito. Sa PART 1 ay pinag-usapan natin ang mga teorya ng mga prominenteng siyentipiko at mathematicians tungkol sa guwang na mundo o ang kani-kanilang hollow earth theory.

Una sa ating listahan ng mapapalad na indibidwal na nakarating na raw sa Kaharian ng Agartha ay si Rear Admiral Richard Evelyn Byrd Jr. Itinuturing na bayani at inspirasyon si Admiral Byrd ng maraming Amerikanong explorer dahil sa kanyang tapang na sumuong sa mga lugar na hindi pa nararating ng tao gaya ng North Pole at South Pole. Ang pagkakasama ni Admiral Byrd sa listahang ito ng mga taong nakarating na daw sa Agartha ay nakabase sa isang diary na isinulat daw niya at lumitaw lang maraming taon na ang nakalipas mula nang siya ay pumanaw.

Hindi binanggit ang salitang Agartha sa diary ni Admiral Byrd. Sa halip ay sinabi dito na ang lugar kung saan napunta si Admiral Byrd ay lupain ng Arianni. Sa ibang mga sources, sinasabing ang Arianni daw ay isa sa mga lahi ng mga naninirahan sa Agartha.

Ang diary, na pinamagatang “The Exploration Flight Over the North Pole,” ay nagsimula sa pahayag ni Admiral Byrd na kailangan niyang isikreto ang pagsusulat niya tungkol sa paglipad niya sa may Arctic nung ika labing siyam ng Pebrero, 1947. Alas seis ng umaga ay naghahanda na sila sa kanilang biyahe papuntang hilaga (north) at 6:10 AM ay lumipad na sila. Ini-record dito ni Admiral Byrd ang mga nangyayari at mga na-oobserbahan niya sa kanilang biyahe — kung may turbulence o ligalig sa eroplano, kung may nakikita siyang bundok, kung nag-radyo siya sa base o kung may leak sa makina, etc.

Bandang alas diez ay may nakita silang bulubundukin at lambak na may ilog o batis na dumadaloy sa bandang gitna. Takang-taka dito si Admiral Byrd at sinabing hindi normal na mayroong luntiang lambak at malagong kagubatan dito dahil ito dapat ay lugar ng yelo at snow. Ang kanilang mga instrumento para malaman ang kanilang direksyon gaya ng compass at gyroscope ay parang nagwawala at di pumipirmi. Ibinaba nila ng bahagya ang eroplano upang mas makita ang nasa ilalim.

Hindi makapaniwala si Admiral Byrd na mayroong malaking hayop na parang elepante siyang nakita. Ginamitan pa niya ng binoculars para mas makita niya ito. Hala! Mukhang isa itong mammoth, isang klase ng hayop na nabuhay noong panahon ng Ice Age at sa pagkakaalam ng lahat, ay naging extinct ilang libong taon na ang nakakaraan. Inirecord ni Admiral Byrd na ang temperatura ay 74°F o 23.3°C. Take note na ang karaniwang temperatura sa North Pole kapag Pebrero, na sakop pa ng winter season, ay  nasa -30° F o  -34°C, kaya ang temperaturang nararanasan noon ni Admiral Byrd ay lubhang kakaiba. Sinubukan niyang kumontak sa base ngunit hindi na gumagana ang radyo.

11:30 AM, lalong namangha si Admiral Byrd dahil tumambad sa kanyang paningin ang animo’y isang siyudad!? Sa puntong ito, ang kanilang eroplano ay parang gumaan at lumulutang at hindi na gumagana ang mga controls nito! Sa parehong kaliwa at kanang pakpak ng eroplano ay nakita niyang may mga lumilipad na kakaibang klase ng sasakyang panghimpapawid. Lalo pang lumapit ang mga sasakyang ito sa kanilang eroplano kaya nakita niya ang mga marka nito na kapareha ng simbolo ng swastika. Ang mga sasakyan ay korteng disc, pabilog na parang CD at kumikinang.

Makaraan ang limang minuto ay tumunog ang radyo at may nagsalita sa wikang Ingles na parang may German o Nordic accent. Ang sinabi nito:

"Welcome, Admiral, to our domain. We shall land you in exactly seven minutes! Relax, Admiral, you are in good hands."

Sa puntong ito ay tumigil na nang tuluyan ang mga makina ng kanilang eroplano at ibang puwersa na ang nagko-kontrol dito. Ilang minuto pa ay nag-landing na ang eroplano. May mga lalaking naglalakad na papalapit at tila sinusundo sila. Matataas ang mga ito at ang mga buhok ay blond ang kulay. Isa sa mga ito ay inutusan si Admiral Byrd na buksan ang pintuan ng eroplano.

Maganda naman ang pakikitungo ng mga matataas na lalaki at wala itong mga armas. Dinala si Admiral Byrd at ang kanyang radioman sa siyudad na tila gawa sa kristal. Nakarating sila sa isang malaking building na ang disenyo ay parang sa isang futuristic sci-fi movie.

Binigyan sila ng maiinom na ayon kay Admiral Byrd ay napakasarap at ngayon pa lang niya natikman. Makalipas ang sampung minuto ay may dumating na dalawang lalaki para ianunsyo na kailangan niyang sumama sa kanila. Wala naman siyang magawa kung hindi sumunod. Kinailangan din niyang iwanan ang kanyang radioman at lumakad na siya kasama ang dalawang lalaki patungo sa isang pasukan na tila isang elevator. Bumaba ang elevator ng ilang sandali hanggang huminto ito at sila ay tumuloy sa mahabang pasilyo. Tumigil sila sa isang malaking pintuan at pinapasok si Admiral Byrd dito. Sinabi ng isang lalaki na huwag siyang matakot dahil kakausapin siya ng Master.

Ang loob ng silid ay napakagara at may mahabang lamesa kung san nakaupo ang Master. Pinaupo nito si Admiral Byrd. Sinabi nito na pinahintulutan nilang papasukin siya sa kanilang mundo dahil kilala siya sa “Surface World” o ibabaw ng daigdig at dahil siya ay may marangal na pagkatao. Sinabi din nito na siya ay nasa lupain ng Arianni, ang mundo sa loob ng Earth. Nagka-interes daw silang papuntahin siya doon nang pasabugin ng mga kalahi ni Byrd ang mga naunang atomic bomb sa Hiroshima at Nagasaki, Japan na nangyari nung 1945. Dahil daw dito ay pinadala nila ang kanilang mga flying machines na tinawag nilang “Flugelrads” sa ibabaw ng mundo para imbestigahan ang nangyari.

Sinabi pa ng Master na hindi raw sila nakikiaalam sa mga nakaraang digmaan ng ating lahi pero dahil natutunan na ng mga tao sa ibabaw ang kapangyarihang hindi nararapat sa tao — ang atomic energy, dito sila nababahala dahil ito ang wawasak sa mundo.  Sinabi ng Master na sinubukan nilang makipag-ugnayan sa lahi ng mga tao sa ibabaw ngunit ang kanilang mga Flugelrads ay pinaputukan lang at hinabol ng mga fighter planes na parang kalaban. May mga emisaryo na ring nagpahatid ng mensahe sa mga may kapangyarihan sa ibabaw ng mundo pero hindi daw nila ito dininig. Kaya si Admiral Byrd ay napili upang maging saksi na ang mundo sa ilalim ay tunay na nage-exist.

Inihayag din ng Master na sa malayong hinaharap ay may bagong mundo rin ang lilitaw mula sa mga nasira ng ating lahi at ang mga taga Arianni ay tutulong para muling buhayin ang ating kultura at mga nawalang kayamanan. Marahil daw na sa panahong iyon ay natutunan na din ng mga tao sa ibabaw na walang kabuluhan ang away at digmaan. Dito na halos tinapos ng Master ang kanilang pag-uusap at maaari na raw makabalik si Admiral Byrd sa ibabaw ng mundo. Ang dalawang lalaking naghatid sa kaniya sa malaking silid ng Master ay naroon uli upang sunduin siya. Bago tuluyang lumabas ay tumingin muli siya sa Master at nginitian siya nito sabay sabing “Paalam, aking anak.”

Paglabas niya ng malaking silid ay tumuloy uli sila sa elevator. Paakyat naman ito ngayon at habang naroon sila, sinabi ng isa sa kanyang mga kasama na kailangan na nilang magmadali dahil ayaw ng Master na mahuli siya sa kanyang schedule. Importante daw na makabalik siya agad upang maiparating  sa kanyang mga kalahi ang mensahe ng Master para sa kanila.

 Sa itaas ay nagkita uli si Admiral Byrd at ang kanyang radioman na tinawag niyang Howie. Mukhang nag-aalala ito kaya pinanatag siya ni Admiral Byrd at sinabing ayos lang ang lahat. Bumalik sila sa kanilang eroplano at gaya ng pagdating nila dito ay ineskortan uli sila ng mga Flugelrads. Ibang puwersa uli ang nagko-kontrol sa eroplano hanggang sa medyo mataas na ang kanilang lipad. Maya-maya pa ay may boses silang narinig sa radyo na sinabing

“We are leaving you now, Admiral, your controls are free. Auf Wiedersehen!!!”

na ang ibig sabihin ay, “Iiwan na namin kayo, Admiral. Sa inyo na ang kontrol, paalam!”

Pinanood nila habang nawala sa kanilang paningin ang mga flugelrads. Ang eroplano naman nila ay animo’y nahulog nang panandalian, pero mabilis nilang nabawi ang control nito. Nakita na uli nila ang mga yelo at snow. Nakapag-radyo na rin sila sa base at nawala ang pangamba nito nang nagkaroon uli sila ng contact. Alas tres ng hapon ay nakapaglanding na rin sila sa base.

Itinuloy diumano ni Admiral Byrd ang pagsusulat sa animo’y diary niya sa petsang March 11 1947. Sinabi niya na sa araw na ito ay dumalo siya sa meeting sa Pentagon at inilahad niya ang kanyang nadiskubre, pati na ang mensahe mula sa Master. Lahat daw ay naka-record at ang Presidente ay nasabihan na. Idinitene si Admiral Byrd ng mahigit anim na oras habang iniinterview siya ng mga Top security forces at ng medical team. Pahirapan daw ang pangyayaring ito. Ang resulta ... binawalan si Admiral Byrd na magsalita tungkol sa kanyang mga nalalaman. At dahil isa siyang taong militar, kinailangan niyang sumunod.

Ang pinakahuling naitala sa diary na ito ay may petsang December 30 1956. Isinulat diumano ni Admiral Byrd na matapat niyang itinago ang sikreto sa mahabang panahon kahit ito ay taliwas sa kanyang moralidad. Pero nararamdaman daw niya na malapit na ang kanyang oras at ayaw niyang isama sa kanyang kamatayan ang sikreto. Ito raw marahil ang natatanging pag-asa ng sangkatauhan.  ... March 11 1957 nang binawian ng buhay si Admiral Byrd habang siya ay natutulog at dahil na rin sa sakit sa puso. Siya ay 68 years old.

== DEBUNKING THE 1947 SECRET DIARY OF ADMIRAL RICHARD BYRD ==

Walang pisikal na dokumento na nagpapatunay na ang diary ay isinulat nga ni Admiral Byrd, hindi gaya ng naunang lumabas na diary niya na isinulat mula 1925 hanggang 1927 at lumitaw lamang nung 1996, 39 years pagkalipas ng kanyang pagpanaw nung 1957.

Ang 1925 diary ay nadiskubre ni Raimund Goerler na archivist ng Ohio State University. Ang 1947 na diary naman ay walang matukoy na tunay na nakadiskubre at wala ring maipakitang larawan man lang ng kahit isang pahina nito na sulat kamay ni Admiral Byrd.

May mga nagsasabi na ang 1947 diary daw ay ipinalathala ng isang pamangkin ni Admiral Byrd pero may mga nagsasabi naman na ang diary daw ay unang lumitaw mula sa isang organisasyong tinatawag na "The Society for a Complete Earth” na ngayon ay tinatawag ng “The Hollow Earth Research Society.” Isa itong organisasyon na naniniwala at nagpapalaganap ng impormasyon tungkol sa Hollow Earth theory. Ang magkaibang impormasyon na ito ay nagdudulot ng pagdududa kung authentic o totoo nga ba na si Admiral Byrd ang nagsulat ng nasabing diary.

Magugulat ka na ang pag-uusap ni Admiral Byrd at ng Master sa “secret diary” ay malaki ang pagkakahalintulad sa dialogue sa isang pelikula noong 1973 na pinamagatang “Lost Horizon.” Hinanap ko tuloy at pinanood ang video ng pelikulang ito. Pinakinggan ko at tinype ang dialogue sa pagitan ng High Lama at ng bidang pinangalanang si Richard Conway. Nang ikumpara ko ang dialogue na ito sa bahagi ng diary ni Admiral Byrd kung saan kinausap siya ng Master ng Arianni ay namangha talaga ako sa halos magkakaparehong pangungusap.

Tignan ninyo ang magkaparehong kulay ng highlight sa kaliwa at sa kanan. Halimbawa, sa Lost Horizon sa kaliwa na naka-highlight ng dilaw ay sinabi ng High Lama na “There will be no safety by arms, no help from authority, no answer in science.” Sa secret diary naman na nasa kanan na naka-highlight din ng dilaw, sinabi ng Master na “There will be no answer in yor arms, there will be no safety in your science.” Hindi ba bahagya lang ang pagkakaiba?

Yung green highlight naman — sa kaliwa, sinabi ng High Lama “It will rage till every flower of culture is trampled, and all human things are leveled in a vast chaos.” Sa kanan, sinabi naman ng Master, “It may rage on until every flower of your culture is trampled, and all human things are leveled in vast chaos.” Hala halos parehong-pareho di ba? At makikita ninyo na ganun din ang iba pang pangungungusap. Mukhang kinopya lang ng kung sino mang nagpanggap na si Admiral Byrd ang mga dialogue mula sa Lost Horizon at isinama ito sa diumano’y secret diary. Pati ang kuwento ng pagkaka-kidnap nila Admiral Byrd para mapunta sa Arianni ay hango din sa pagkaka-kidnap kay Richard Conway at mga kasamahan niya para mapunta sa Shangri-la.

Ang pinakamalakas na ebidensya na hindi totoong isinulat mismo ni Admiral Byrd ang 1947 diary ay ang US NAVY ANTARCTIC DEVELOPMENT PROJECT o codename Operation Highjump. Ito ang pinakamalaking ekspedisyon sa Antarctica at pinamunuan at inorganisa mismo ni Admiral Byrd ang may apat na libong military men gamit ang labingtatlong barko at dalawamput tatlong sasakyang panghimpapawid. Bukod sa pagtatayo ng base at paliparan sa Bay of Whales sa Antarctica, ilan pa sa  pangunahing misyon ng Operation Highjump ay ang i-train ang mga military personnel at subukin ang mga kagamitan nila sa kondisyong may napakalamig na temperatura na gaya ng Antarctica. Nagsimula ang operasyon ng August 26 1946 at nagtapos ng April 1 1947.

Kahit pa nakalagay sa Wikipedia na nagtapos ang Operation Highjump bandang Pebrero ng 1947, ang totoong petsa na nakalagay sa opisyal na report ng Signal Corps Observer kung kailan nagtapos ang mga aktibidades ng ekspedisyon ay April 1 1947. Hindi maaaring iwanan ni Admiral Byrd ang ekspedisyon na ito hangga’t hindi ito tuluyang natapos dahil siya ang officer in charge at kanya itong proyekto.

Kung nasa Antarctica — sa may South Pole si Admiral Byrd noong Pebrero 1947, malabong bigla na lang niyang iiwan ang kanyang mga tauhan habang nasa kalagitnaan ng kanyang pinakamalaking ekspedisyon, para pumunta sa kabilang dulo ng daigdig sa North Pole, kung saan nangyari ang nakasulat sa diumano’y diary niya daw ng February 19 1947.

Mayroon ding detalyadong salaysay tungkol sa Operation Highjump ang south-pole.com base sa research ng mga miyembro ng American Society of Polar Philatelists at kitang-kita sa mga petsa na nandoon mismo si Admiral Byrd sa Antarctica at South Pole ng Pebrero 1947 at kung gaano katagal  ang biyahe mula South Pole pabalik ng Amerika, lalo pa kaya kung papuntang North Pole. Kaya napaka-imposible ang sinasabi ng napakasikat na ngayong secret diary daw ni Admiral Byrd. Kung sino man ang sumulat nun, malamang ay nalito at nailagay na nagpunta si Admiral Byrd sa North Pole imbes na sa South Pole. O di kaya, hindi siguro nito na-research mabuti na nasa South Pole pala si Admiral Byrd sa petsang iyon.

May pangyayari sa Operation Highjump na nagkaroon ng malaking natuklasan ang isa nilang kasamahang piloto. Isang PBM ang minamaneho ni Lieutenant Commander David E. Bunger. Ang PBM ay isang seaplane na dinisenyo para sa World War 2. Isa itong eroplanong pwedeng maglanding sa tubig. Lumipad si Bunger at kanyang crew. Nagulat si Bunger nang sa gitna ng tila walang hanggang yelo sa Antarctica na purong puti ay biglang nag-iba ang kulay. Nilapitan nila ito at tumambad sa kanila ang asul at berdeng lawa (lake) at tsokolateng kulay ng mga burol (hills)! Isang malaking lupain na walang yelo?! Kamangha-mangha talaga! Ininspeksyon nila ang lugar at ini-landing pa ni Bunger ang PBM sa isa sa malalaking lawa para tignan ang temperatura nito na nasa 38°F o 3.33°C. Ito ay mainit-init kumpara sa karaniwang temperatura sa Antarctica.

19-B Na-excite din ang mga mamamahayag sa discovery na ito at mabilis itong kumalat sa mundo. Inihalintulad nila ito sa Shangri-La at ang init daw dito ay may misteryosong pinanggagalingan. Ang Shangri-la ay ang lugar na hango sa nobela ni James Hilton na “Lost Horizon” kung saan walang kaguluhan at walang tumatanda. Ang nobela ay inilathala noong 1933 at ito rin ang pinagbasehan ng pelikulang binanggit na natin kanina.  Ang lugar na nadiskubre ni Lieutenant Commander Bunger ay pinangalan sa kanya — ang Bunger’s Oasis at kinalaunan ay pinalitan ito at ginawang Bunger Hills. Nasabi tuloy ni Admiral Byrd sa kanyang interview noong 1954 na marami pang pwedeng tuklasin sa South Pole

“... and that's beyond the pole on the other side of the South Pole from Little America. And it's, ah, I think, it's quite astonishing that there should be an area as big as that unexplored ... so there's a lot of adventure left down at the bottom of the world.”

Na-misinterpret naman ito ng mga Hollow Earthers na ang ibig sabihin daw ng sinabi ni Admiral Byrd na “beyond the pole” at “bottom of the world” ay ang inner earth. Pero may paliwanag ang mga geologists sa nangyari sa Bunger Hills. Ito daw ay dumaan sa deglaciation — ang pagkatunaw ng mga glaciers o mga gabundok na yelo  na resulta ng  climate change — kaya lumitaw ang lupa at mga burol na dating natatakpan ng yelo.