Pilipinas, Makakagamit ba ng 1Gbps Starlink Internet ni Elon Musk?

Makakatulong kaya at mapapakinabangan sa Pilipinas ang Starlink satellite project ni Elon Musk at ng SpaceX?

Table of Contents

1. Kulelat ang Pilipinas sa Pabilisan ng Internet
2. Ano ang Starlink?
3. Gaano Karaming Satellites?
4. Kailan Nag-umpisa ang Starlink?
5. Bakit Nilikha ni Elon Musk ang Starlink? (Tunay na Dahilan)
6. Test Satellites na Tintin A at Tintin B
7. Unang 60 Starlink Satellites
8. Mga Sumunod na Starlink Satellites
9. Paano Maging Beta Tester ng Starlink?
10. Responsibilidad ng Starlink Beta Tester
11. May Bayad ba Maging Starlink Beta Tester?
12. Paano Gagana ang Starlink?
13. Nagsimula na ang Private Beta Testing
14. Paunang mga Speedtest Results ng Private Beta
15. Ano nga ba ang kaibahan ng Starlink sa ibang mga internet providers?
16. Makabagong Teknolohiya ng Starlink
    • Krypton Ion Thrusters
    • Antenna ng Starlink Satellites
    • Paano Pumupuwesto sa Kalawakan ang Starlink Satellites?
17. Mga Problemang Posibleng Idulot ng Starlink
18. Mga Hamon sa Starlink
    • Pagpapadala sa Kalawakan
    • Mahal ang Presyo ng Terminal/Satellite Dish
19. Magkano Mag-Subscribe sa Starlink?
20. Maaabot ba ang Pilipinas ng Starlink?
21. Republic Act No. 7925
22. Open Access in Data Transmission Act
23. Executive Order na Magtatanggal sa Requirement ng Prangkisa

Kulelat ang Pilipinas sa Pabilisan ng Internet

Ayon sa Speedtest Global Index ng Ookla, as of August 2020, ika-120 ang Pilipinas out of 140 na bansa sa ranking ng bilis ng mobile internet at ika-106 naman out of 174 countries sa bilis ng fixed broadband internet! 

Mukhang kasama tayo sa mga nangungulelat na bansa pagdating sa pagkakaroon ng mabilis na internet connection. Hindi pa kasama sa datos na iyan ang mga kababayan nating wala talagang access sa internet. 

Kung magiging available dito sa atin ang Starlink internet ni Elon Musk na ang target na bilis ay nasa 1 gigabit per second o 1000 megabits per second, wow laking ginhawa nito para sa ating mga Pilipino! 

Ang Starlink ay isa sa mga malalaki at ambisyosong proyekto ni Elon Musk. Si Elon Musk ngayon ang panlima sa mga bilyonaryo at pinakamayayamang tao sa buong mundo, kasunod ng Facebook CEO na si Mark Zuckerberg. 

Ano ang Starlink?

Ang Starlink ay isinasagawa ng kumpanya ni Elon na Space Exploration Technologies Corp o SpaceX. Binubuo ito ng konstelasyon ng libo-libong mga satellites sa Low Earth Orbit o LEO na naglalayong maghatid ng mabilis at epektibong internet access sa mababang halaga sa kahit saan man sa mundo, lalo na yung mga malalayo sa kabihasnan at mahirap abutin ng serbisyo ng mga kasalukuyang network providers.

Gaano Karaming Satellites?

Libo-libong satellites? Ilang libo? Nauna nang naaprubahan ng U.S. Federal Communications Commission nung April 2019 ang sinumiteng papeles ng SpaceX na makapaglatag ng 12,000 satellites sa Low Earth Orbit. Nung October 2019, nagsumite uli ang SpaceX ng panibagong proposal na magdagdag ng 30,000 pang satellites. Kapag naaprubahan ito, magkakaroon ng 42.000 Starlink satellites na papalibot sa Earth.

Sa buong kasaysayan, mayroon lang mga 9,000 satellites ang lumipad sa kalawakan mula sa Earth. As of April 2020, kulang sa 2,000 satellites ang nasa Low Earth Orbit, ayon sa Union of Concerned Scientists. Iyan na ang total na bilang ng lahat ng mga aktibong satellites na nasa Low Earth Orbit mula sa iba’t ibang bansa, kasama na ang Maya-1 at Diwata-2 satellites ng Pilipinas. Ibig sabihin, mahigit dalawampung beses na mas marami ang mga satellites na ipapadala ng SpaceX  kaysa sa mga naroon na sa kasalukuyan.

Kailan Nag-umpisa ang Starlink?

2015 nang unang inanunsyo ni Elon Musk ang plano ng SpaceX na mag-develop ng makabagong teknolohiya ng mga satellites, kasabay ng opisyal na pagbubukas ng bagong headquarters ng SpaceX sa Washington state. (Elon Musk) Ang isinasagisag nito ay ang opisyal na pagbubukas ng SpaceX Seattle.

Credit: YouTube/Cliff O (screenshot)

Sinabi niyang ang Seattle, Washington ang magiging sentro ng gawain pagdating sa mga satellites habang ang mga rockets naman ay dinedevelop sa California at ngayon ay mayroon na rin sa Texas kung saan ginagawa ang Starship, ang rocket na gagamitin papuntang Mars.

Speaking of Mars, nabanggit ni Elon sa kanyang speech sa Seattle, na bukod sa Earth, plano rin nilang gawin ang konstelasyon ng mga satellites sa Mars. Sinabi niyang mangangailangan rin ang Mars ng pangmalawakang komunikasyon. Alam naman nating ang pagpunta sa Mars ang talagang pangarap ni Elon at ng SpaceX kaya kapag natuloy ito, ang komunikasyon sa pagitan ng Mars at Earth ay sadyang mahalaga. Dito ay mapapakinabangan nga naman ang sistema ng Starlink.

Bakit Nilikha ni Elon Musk ang Starlink? (Tunay na Dahilan)

Mayroong inamin si Elon sa kanyang talumpati. Hindi itinago ni Elon na bukod sa layunin nitong makapaghatid ng mas mabilis at epektibong internet connection sa buong Earth at pati na sa Mars, mayroon pa siyang mas matinding dahilan kung bakit tinatayo niya at ng SpaceX ang Starlink. Sinabi niyang ang Starlink ay isang paraan upang makapag-generate ng kita na susuporta sa pagtatayo ng siyudad sa Mars na siyempre ay nangangailangan ng maraming maraming pera para maisakatuparan.

Gumawa ng estimate ang website na forbes.com ng posibleng kikitain ng Starlink. Ayon sa kanilang kalkulasyon, base sa dami ng internet users na magsusubscribe dito na tinatayang mga 14.4 million sa halagang mga 60 dollars bawat isa, pagdating ng 2025 ay pwede itong kumita ng mga 10.4 billion US dollars sa isang taon. Hindi na masama, di ba, kumpara sa kita ng SpaceX sa mga rockets nito na nasa dalawa hanggang tatlong bilyong dolyar bawat taon? Ibig sabihin, hindi lang doble kundi mga limang beses na mas malaki ang posibleng kitain ng Starlink. 

Mas optimistic ang projection ng SpaceX. Sa nasilip na mga internal documents ng The Wall Street Journal mula sa SpaceX, tinatarget pala ng kumpanyang, by 2025, ang kita ng Starlink ay nasa 22 billion dollars na kada taon. Hinulaan naman ng mga financial analysts ng Morgan Stanley na aabot sa 30 billion dollars kada taon ang pwedeng kitain ng Starlink. Wow! Magiging malaking tulong nga ito sa Mars missions kapag nagtagumpay ito at isang paniguro upang hindi maubusan ng pondo sa mga gastos nito sa biyaheng Mars.

Test Satellites na Tintin A at Tintin B

February 22 2018 nang unang ipinadala ng SpaceX sa low earth orbit ang dalawang demo satellites na pinangalanan nilang Tintin A & B. Nakisabay lang ito sa primary payload ng Falcon 9 rocket nang araw na iyon — ang PAZ satellite ng kumpanya sa Spain na Hisdesat. Bagamat pang anim na buwan hanggang isang taon lang inasahang magagamit ang Tintin A & B, humaba pa ang buhay nito hanggang dalawang taon at napakinabangan bilang pang-testing para maiayos ang mga sumunod na ipinadalang satellites. Dahil tapos na ang trabaho nito, kontroladong pinabagsak ang Tintin B nitong August 2020 at ang Tintin A nitong September 2020 upang masunog sa atmosphere nang Earth.

Unang 60 Starlink Satellites

May 24 2019 nang inilunsad ang unang 60 Starlink satellites na ang disenyo ay siya nang gagamitin sa produksyon. Pang-testing pa rin ang mga ito at wala pang kapabilidad na makapag-usap sa bawat isa, pero mayroon itong komunikasyon sa mga antenna na nasa Earth. Sa ngayon mga 39 sa mga ito ang pinabagsak na sa Earth habang ang mga natira ay unti-unti na ring pinabababa ang lipad.

Mga Sumunod na Starlink Satellites

November 11 2019 nang inilunsad naman ang sumunod na 60 satellites na siya ring unang batch na gagamitin na sa operasyon ng Starlink. 

Nitong 2020 ay nagsunod-sunod na ang pagpapalipad ng mga Starlink satellites buwan-buwan at minsan ay dalawang beses pa kada buwan. Kadalasan ay tag-animnapung satellites ang pinakakawalan bawat lipad ng Falcon 9, pwera na lang kung may ibang payload na nakikisakay o yung tinatawag ng SpaceX na rideshare. Sa bawat rideshare ay binabayaran ang SpaceX ng 1 million dollars na isang paraan kung paano kumikita ang mga rockets ng SpaceX. Sa ganitong pagkakataon, mga 58 o 57 Starlink satellites lang ang sakay ng Falcon 9. 

Nitong October 6 2020 lang ang pinakahuling paglipad ng 60 Starlink satellites. So far, mayroon nang mahigit 700 Starlink satellites na nasa orbit, sapat na upang simulan ang public beta testing. Ayon kay Elon Musk, kapag narating na ng mga satellites ang target nitong posisyon, maaari nang simulan ang public beta sa Northern US at baka sakali, pati na rin ang Southern Canada. Susunod na rin ang ibang mga bansa, depende sa pagpayag ng gobyerno ng mga kani-kanyang bansa.

Paano Maging Beta Tester ng Starlink?

Pwede ba sumali ang mga Pilipino sa public beta testing kapag binuksan na ito sa ibang bansa? Pwede nating subukan. Punta lang tayo sa official website ng Starlink, ang starlink.com. I-type ang iyong email address at ang iyong Service address – kung saan ka nakatira. Mayroon nang mga address na nakalagay dito at kailangan mo na lang i-click kung alin ang nagma-match sa address mo. Kung hindi eksakto, piliin mo na lang ang pinakamalapit sa lugar mo. Halimbawa, nakatira ka sa Chicago Street, Cubao, Quezon City. Wala itong eksaktong ka-match kaya subukan mong i-type ang Chicago, Quezon City at ayan, lumabas ang Chicago, Quezon City, Metro Manila, Philippines. Pwede mo na yan i-click. 

Submit your email to starlink.com for updates and a chance to become a beta tester

O pwede mo rin gamitin ang Plus Code kasama ang iyong city. Ang Plus Code ay maari mong makuha gamit ang Google Maps app sa iyong Android phone. Hanapin lang ang iyong street address, halimbawa uli ay Chicago, Quezon City. Kapag lumabas na sa search ang lugar, i-tap mo lang yan at makikita mo ang kalye o lugar sa mapa. I-tap mo lang ng matagal yung lokasyon at lalabas yung pulang pin. Mag-scroll ka sa bandang ilalim ng screen at makikita mo doon yung plus code icon. 

Katabi nito ang Plus Code na J2GW+9J at ang siyudad na Quezon City, Metro Manila. Ito ang i-type mo sa Service Address box at ayan, lumabas na agad. I-click mo na lang iyan at pwede mo nang i-click ang SUBMIT. Kapag nag-check ka ng email mo, makikita mo ang acknowledgment email ng Starlink. Sinasabi dito, “If you provided us with your address, you will be notified via email if beta testing opportunities become available in your area.” Ibig sabihin, posible na makasama ka sa beta testing kapag naging available ito sa area mo.

“In the meantime, we will continue to share with you updates about general service availability and upcoming Starlink launches.” So, habang wala pa, maaari kang padalhan ng updates ng Starlink. Medyo matagal pa ito, mga 2021 o 2022 pa,  kung makakasama nga ang Pilipinas dahil uunahin muna sa US at Canada.

Importante sa SpaceX na ang mga unang makakasama sa beta testing ay nakatira sa mga lugar na malayo sa siyudad at may maaliwalas na view o tanawin ng Northern Sky.

Pero kung sakaling maging available na nga ito sa area mo, at padalhan ka ng notification ng SpaceX na isinasama ka bilang beta tester ng Starlink, isa ka sa mga unang gagamit ng Starlink satellite internet system. Dahil beta testing pa lang ito, hindi pa ito perpekto. Pwedeng intermittent o hindi pa stable ang connection.  Ang feedback galing sa iyo at ibang beta testers ang tutulong sa SpaceX na mapabuti ang kanilang sistema para masegurong magawa nila itong pinakamagaling na satellite broadband internet system.

Responsibilidad ng Starlink Beta Tester

Bilang beta tester, makakatanggap ka ng Starlink kit na ipapadala via FedEx. Ang laman nito ay ang Starlink dish o terminal, router, power supply, mga kable at dish mount. 

Credit: Twitter/TesBros

May responsibilidad kang gamitin ang Starlink ng at least mga 30 minutes hanggang isang oras kada araw at sagutin ang mga surveys na ipapadala ng SpaceX sa loob ng walong buwan para magbigay ng feedback. Pipirma ka ng Non-Disclosure Agreement kung saan nakasaad na hindi mo puwedeng isapubliko ang iyong karanasan bilang beta tester. Ibig sabihin, hindi mo ito pwedeng i-vlog o i-post sa social media.

May Bayad ba Maging Starlink Beta Tester?

Libre ang paggamit ng hardware at serbisyo ng Starlink pero may napakaliit na charge na 1 dollar o mga 48 pesos lang naman kada buwan. Ito ay upang ma-test nila ang kanilang ordering at billing systems bilang bahagi ng beta program. Sisingilin ito 30 days pagka-deliver ng Starlink kit.

Paano Gagana ang Starlink?

Para gumana ang Starlink, simple lang ang sinabing instructions ni Elon Musk: Plug in socket and Point at sky. Inilarawan niya ang terminal na parang manipis na flat na pabilog na UFO na nasa stick. Mayroon daw itong mga motor na kayang mag-adjust ng anggulo nito upang makita nang maige ang langit kung saan naroon ang mga satellites.

Nagsimula na ang Private Beta Testing

Siyempre, si Elon Musk ang isa sa mga unang sumubok ng Starlink. October 22 2019 pa ng nakapag-tweet siya gamit ang Starlink kung kailan ang nasa orbit pa lang ay ang Tintin A & B at ang animnapung test satellites.

July 2020 nang sinimulan ang private beta trials. Ito ay eksklusibo para lang sa mga kaibigan at kapamilya ng mga empleyado ng SpaceX at by-invitation lamang.

Paunang mga Speedtest Results ng Private Beta

Nasilip ng mga taga-reddit na tinatawag ding redditors ang resulta ng speedtest ng ilan sa mga private beta testers. Karamihan sa mga ito ay nasa Seattle, Washington area, kung nasaan ang headquarters ng Starlink. Ang iba naman ay sa Los Angeles, California at mayroon ding sa Honolulu, Hawaii. Magaling na detectives ang mga redditors at nahanap nila ang mga data na ito galing sa speedtest.com ng Ookla. Dahil nga sa pagpirma ng mga beta testers ng  Non Disclosure Agreement, hindi pa talaga pampubliko ang mga data na ito. Pati ang mga impormasyon tungkol sa Starlink kit, mga responsibilidad ng beta testers at iba pa ay sa kanila ko rin nakuha.

Makikita dito na ang pinakamababang ping o latency ay 18 milliseconds, ang pinakamabilis na download speed ay 130.73 megabits per second at ang pinakamabilis na upload speed ay 42 megabits per second. 

Hindi na masama! Sa ganitong bilis, kaya nang mag-stream ng HD movies nang sabay sabay, sakaling may dalawa o higit pang computers ang nakakabit sa Starlink router. Pasok na pasok na din yan sa online gaming lalo na sa mga first person competitive shooter games gaya ng CSGO at Call of Duty. 

Pero ang resultang iyan ay malayo pa sa target ng SpaceX na 1 gigabit o 1000 megabits per second para sa download speed. Natural lang naman ito dahil beta stage pa lang at kakaunti pa ang dami ng Starlink satellites na gumagana, kumpara sa target nitong 42,000 satellites. 

Ano nga ba ang kaibahan ng Starlink sa ibang mga internet providers?

Ang mga Starlink satellites ay umiikot sa low earth orbit sa taas na 550 km na sasakop sa buong mundo samantalang ang karamihan ng mga satellite internet providers, ang satellites nila ay nanggagaling sa iisang geostationary satellite na nag-oorbit sa Earth sa taas na 35,000 km. Sumasabay ang ikot nila sa rotation ng Earth kaya ang coverage nito ay nasa isang partikular na rehiyon lang ng Earth. Dahil mas malapit ang mga Starlink satellites, mas mabilis rin ang biyahe ng impormasyon mula ground papuntang satellite at pabalik. At dahil bumibiyahe ang signal sa vacuum of space, mas mabilis ito ng mga 50% kaysa sa fiber internet na gumagamit ng fiber-optic cable. Kumpara naman sa 5G, parehong may mga advantages at disadvantages ang 5G at ang Starlink na mas tatalakayin natin sa ibang article.

Makabagong Teknolohiya ng Starlink

Sadyang kahanga-hanga ang makabagong teknolohiya ng Starlink na, ayon sa teslarati.com ay dinesenyo lahat ng SpaceX.

Ang Starlink satellites ang kaunaunahang spacecraft na gumagamit ng krypton bilang power source. Yes, you heard it right! Krypton as in yung planetang pinanggalingan ni Superman! Pero ang Krypton na gamit ng Starlink ay ang chemical element na Krypton na may atomic number na 36.

Krypton Ion Thrusters

Ang bawat Starlink satellite ay mayroong krypton ion thrusters na siyang mag-aangat ng satellite mula sa 440 km kung saan ito pinakawalan papunta sa 550 km sa siyang target orbit nito. Ito rin ang magmamaneobra ng satellite sakaling kailangan nitong umiba ng orbit o umiwas sa ibang spacecraft. 

Credit: SpaceX

Noon pa ginagamit ang ion thrusters para sa mga satellites pero imbes na Krypton gas ay Xenon ang karaniwang ginagamit. Mas madalang na natatagpuan sa Earth ang Xenon kaya ito ay mahal habang mas sagana naman ang ating atmosphere sa Krypton. Dahil dito malaki ang matitipid ng SpaceX na itinatayang nasa 50,000 dollars o mahigit pa sa bawat satellite.

Antenna ng Starlink Satellites

Ang apat na antenna ng isang Starlink satellite ay nakakabit mismo sa katawan nito, imbes na nakalabas o nakausli gaya  sa mga karaniwang satellites. Dahil dito, maiiwasan ng Starlink ang posibilidad na maaksidenteng matanggal ito.

Credit: SpaceX

Paano Pumupuwesto sa Kalawakan ang Starlink Satellites?

Ang pagpapatong-patong ng mga 60 satellites upang magkasya sa Falcon 9 at ang pagpapakawala nito nang sabay-sabay ay isa ring unique at kakaibang style ng SpaceX. Kusang maghihiwahiwalay ang mga ito upang pumunta sa sari-sarili nitong mga puwesto sa orbit sa pamamagitan ng mga krypton ion thrusters nito.

Credit: SpaceX

Mga Problemang Posibleng Idulot ng Starlink

Kung nakikita nating mukhang napakaganda ngang proyekto ng Starlink, mayroon ding nakikita ang mga eksperto na posibleng idulot nitong problema. 

Una, dahil sa napakarami ng mga satellites nito, naroon ang peligro ng pagbabanggaan hindi lang sa kapwa nito Starlink satellite kundi pati sa ibang mga satellites. Sinabi ni Elon na may kakayahan sa computer program ng mga satellites na umiwas sa posibleng banggaan.

Pangalawa, umaangal ang mga astronomers dahil natatakpan daw ng liwanag nito ang view nila ng mga objects sa kalangitan gaya ng mga bituin, planeta, galaxy, meteors, asteroids at iba pa kaya nakakaapekto ito sa trabaho nila. Ang tugon naman dito ng SpaceX, nilagyan nila ng visors ang mga satellites para sanggain ang sinag ng araw na tumatama sa antenna nito at nagdudulot ng nakasisilaw na liwanag. Tinawag ang mga bagong version ng satellites na VisorSat.

Pangatlo, ang mga hindi na gumaganang satellites ay posibleng makadagdag sa space junk o basura sa space. Ang sabi naman ng SpaceX, sa dulo ng buhay ng mga satellites, gagamitin nito ang sariling propulsion system upang mag-deorbit at kontroladong magpabagsak at masunog sa atmosphere ng Earth.

Mga Hamon sa Starlink

Pagpapadala sa Kalawakan

Isang hamon sa SpaceX ang pagpapadala ng satellites nang maramihan. Hanggang 60 lang ang kayang dalhin ng Falcon 9 rocket pero kapag gumana na ang Starship ay kaya nitong magdala ng hanggang 400 satellites bawat biyahe. 

Mahal ang Presyo ng Terminal/Satellite Dish

Ang isa pang mas malaking hamon ay kung paano mapapababa ang presyo ng terminal o satellite dish. Inamin ni Elon na taon pa ang kailangan para masolusyonan nila ito.

Sa ngayon, ay mayroon nang lisensya ang SpaceX para sa paggamit ng 1 million user terminals sa US.

Magkano Mag-Subscribe sa Starlink?

As of this time, October 19 2020, wala pang pinal na halaga kung magkano ang sisingilin ng SpaceX para sa subscription sa Starlink internet dahil pinag-aaralan pa nila kung paano ito mapapababa para maging affordable sa lahat.

Maaabot ba ang Pilipinas ng Starlink?

Ang pinakamalaking tanong nating mga Pilipino... maaabot nga kaya tayo ng serbisyo ng Starlink kapag tuluyan na itong nag-operate? Sa ngayon ang mga bansang nababanggit na mayroon nang lisensya o tinatrabaho na ng SpaceX ay ang U.S., Canada, Caribbean, Germany, Africa, Australia, Mexico, New Zealand, United Kingdom, Argentina, Netherlands, Greece, Austria, Spain at France. Ang sagot sa tanong, kung sa coverage lang, definitely, sakop ng Starlink ang Pilipinas.  Kayang-kaya tayong bigyan ng Starlink ng malakas at mabilis na internet access!

Republic Act No. 7925

Ang problema lang ay ang batas natin patungkol sa mga internet providers na luma na at hindi na applicable sa panahon natin ngayon. Sa ilalim ng Philippine Constitution, isinasaad sa Philippine Telecommunications Policy Act o Republic Act No. 7925 na ang mga public telecommunications services, kasama na dito ang fixed, mobile at satellite services ay nangangailangan ng legislative franchise mula sa kongreso bago makapag-operate. Ibig sabihin, kailangan munang magpasa ng batas ang kongreso na nagbibigay ng prangkisa sa isang internet network o satellite service provider. Kailangan din na at least 60% na pag-aari ng Pilipino ang nasabing provider.

Kung baga dadaan muna sa butas ng karayom ang sino mang baguhang nagnanais na pumasok sa bansa upang makapagbigay ng internet service, gaya ng Starlink. No wonder, isa tayo sa may pinakamabagal na internet speed sa buong mundo.

Open Access in Data Transmission Act

Ang proposal sana na tinawag na Open Access in Data Transmission Act na inihain pa nung 2017 ang magtatanggal ng requirement na kailangan pang isabatas ng  kongreso ang pagbibigay ng prangkisa upang makapag-operate ang network. Kapag naaprubahan ito, dadami ang makakapag-alok ng mas epektibong internet service, hihigpit ang kumpetisyon at magpapagalingan ang mga ito sa serbisyo. Ang kaso, hanggang ngayong 2020 ay nakabinbin pa rin ito sa kongreso!

Executive Order na Magtatanggal sa Requirement ng Prangkisa

Pati ang mungkahi ng Philippine Chamber of Commerce and Industry na aprubahan ang Executive Order na paluwagin ang batas para sa satellite access at palawigin ang internet connectivity sa bansa ay mukhang ayaw ring pirmahan ni Presidente Duterte. Ayon kay Presidential spokesman Harry Roque, kailangan pa raw itong aralin mabuti. (facepalm) Sana lang, kapag handa na ang Starlink na mag-operate dito sa Pilipinas, napirmahan na ang mga batas na dapat pirmahan nang makaranas naman ang mga Pilipino ng mabilis na internet.